روعتك

[الحسن الصديق احمد]

محتار معاك.. يوم أشتهيك
تسبقني دايماً لهفتك.....
أنا والغرام دربين طوال
شاقين مداخل سكّتك
حاضنين صباحاتك كلام
عاشقين نجيمة طلتك
والنظرة من عينيك صباح
إشراقه زايد.... روعتك
أديني من روحك جمال
أو من مداخل بسمتك
ختيني في صدرك وشاح
تدّفي ساعة رجعتك...
وأنا في رجاك زي الفراش
مستني موكب عودتك....
ياريتني لو بقدر اكون
غيمة بتضلل مشيتك
أو واحة في نص الطريق
مشتاقة تهمس كلمتك
أسقيك حنان تدفي بي
او في الهجيرة أضللك
وأنا من زمان حارس مجيك
ياعمري جد ... بتنفسك .
لو أي زول عرف الحياة
إنو السعادة هي منبعك
كان السحاب بقى من عطر
وإستنشقت كل الخلايق روعتك

[profzoal]

والله ..بعد ما افرحتنا

نرجع نقول ليك حيرتنا

فى وصفك كلام
عشناه جد فى عمرنا

كاتمنوا جو القلوب
ذايد كمان من همنا

ايام جميلة وحب كبير
فرح ونغم بى دندنا

امل ورغبة وامنيات
ياريت الامل والامنيات بيدنا

كان واحتك كل الحبائب
والبحبو خليناهم بيجمبنا

بس خلاص ماعندى تانى كلام
ولا قادر ووصف ليك الفرح ولا حبنا

تسلم اخى الرائع الحسن