من الواقع

[المايسترو]

مشهد اول
مستشفي الخرطوم في بدايات سنة 2006
الصباح الباكر قادم الي المستشفي بداية يوم عمل في وحدة دكتور محمد مرغني
وانا قادم علي المكتب عرفت ان اليوم معانا طبيبات امتياز اليوم اول يوم عمل معهم
انتظرت في المكتب لحين وصول الاخصائي لبداية المرور وانا داخل المكتب ومعي احد الزملاء
اتو ثلاثة حسناوات يرتدين افخر ما انتجته المصانع الانجليزية ويتعطرن باجمل ما انتجته المصانع الباريسية
ويقودون افضل ما انتجته مصانع اليابان واتو علي المكتب مباشرة
وبدأ الحوار
هاي شباب
دي وحدة دكتور مرغني
نعم يا شباب
انحنا معاكم في الوحدة من الليلة ولمدة ثلاثة اشهر
انا /مرحب بيكم
هم /الاخصائي ما وصل
انا/ بجي بعد شوية
وحضر الاخصائي وبدينا المرور وبدينا بغرفة الرجال ومستشفي الخرطوم كما تعلمون
عنابره حالها يغني عن السؤال وبمجرد دخولنا الي اول عنبر احدي الحسناوات لزميلتها
ياي انحنا حنستحما القرف دة ثلاثة اشهر مبالغة يا ........................
حاواصل

[sudani]

لك التحية
ولو انك عدت هذه الايام للمستشفى عافاك الله ربما زيارة لوجدت ان الحال تبدل
اسمح لى اخى ان احييك الف الف تحية على توقيعك الرائع هذا

[المايسترو]

وبدينا المرور والاخصائي يشرح في الحالات وهم يتهامسون في الموبايل
كأن الامر لا يعنيهم بالمرة حتي ان البروف في احدي المرات رمقهم بنظرة حادة جعلتهم يتوقفون عن الكلام بالهاتف وبدؤ الانتباه للشرح عن الحالات ولكن بدون تركيز حتي انتهت جولة المرور وعدنا الي المكتب وبدأنا مراجعة الحالات
فسألتني احداهم انتو يا دكتور خالد طوالي بالحالة دي فقلت لها هذا وضعنا الطبيعي
ان نكون في حالة تاهب دائما فنحن هنا لمساعدة هولاء المرضي بقدر ما اوتينا
لكن كيف مستحملين القرف دة يا دكتور
قلت ليها ماذ تقصدين بالقرف هل حالة العنابر ام حالة المرضي قالت كلو قلت ليها دة قدرنا ان نكون اطباء ويجب ان نتأقلم علي كل الظروف فهولاء المرضي احوج ما يكونون الينا وانت اذا لم يعجبكم الوضع هنا فيمكن ان تذهبي الي المكان البريحك
يكون نظيف ومكيف ويليق بمقامك السامي يا دكتورة
قالت لي انت مالم مسيخ كدة يا دكتور
وحاواصل

[سندريللا]

تعرف يا دكتور الانسان يكتسب الخبرة فقط وفقط من المعاناة و التجربة . فماذا تتوقع من مثلهن؟؟

[Modassir Elshibly]

هن ليس بملكات للرحمة

كما يصطلح علي الاطباء (ملائكة الرحمة )

ومجردات من الانسانية

فقط طوبي لاطباء السودان الذين يبذلون ما بوسعهم لراحة مواطنيهم رغما عن الامكانيات الشحيحة والاليات التي لا تصلح لانقاذ حياة الحيوانات ناهيك عن انسان

فطوبي لهم

ولنا الصبر .ز

[ياسـر]

أحييك على هذا

لكن لقد تغير الحال الأن كثيراً

واٌول لك رغم شح الإمكانيات...تجد ما يبدلك عنها

وهي المعاملة الطيبة والحسنة التي يمتاز بها الشعب السوداني....

والإخوان ما بيقصروا والله..بتقصر المعدات

ولك التحية

[ميمى]

المشكلة يا دكتور خالد فى الجامعات المتخرجين منها وأسلواب التعامل مع هؤالاء
الحناكيش وما ادارك بالحناكيش لكن فى النهاية الطب خدمة إنسانية وضمير
وإذا فقد الطب هاتين فقد نسأل الله السلامة لمرضانا ومستشفياتنا

[تاجوج]

السلام عليكم و صباح الخير .. تحية للأطباء في كل العالم .. و بالذات الطبيب السوداني لأنه باختصار نعم الطبيب .. أما عن ما ذكرته عن (أشباح الاطباء) فهو للأسف عند الكثير يعتبر هو الرقي و الحضارة و البرستيج و الانفتاح .. بالذات عند الشباب و الشابات .. و هناك موقف لعينة من هذه الطبيبات مع عمي رحمة الله .. و اذا اتسع صدركم لي .. سآتي على ذكره لاحقا ..لكم التحايا و دمتم ..

[المايسترو]

سنواصل ما اتنقطع انشاء الله

[سيدة الاقمار]

لك التحية و لن اعلق على ما طرحته ابدا و دون اي اسباب الان و لكن اتمنى ان ارى المزيد و المزيد من الاراء ...

[المايسترو]

وبدأنا بعد ذلك العمل معهم في المحولة وفي الحوادث وفي الطواف وحاولنا ان نغير نظرتهم الي العمل الطبي وكنا نريد ان نوصل لهم رسالة ان الطبيب يجب ان يمنح المريض كل احاسيسه ومشاعره وان يعيش معه بكل حواسه فهو لجأ اليك متألما فاقل ما يمكن ان تبذله من اجله ان تجعله يحس بالامان والراحة معك ولكن يبدو اننا كنا كمن ننفخ في قربة مقدودة
حتي جاء يوم وكان اول يوم نبطشية في الحوادث علي واحدة منهم وطلب منا البروف المبيت في المستشفي فحاولت ان تأتي بالاعذار وقالت ان اليوم زواج احدي صديقاتي ولكن البروف بحسم قال لها انت اليوم نبطشية مع خالد فارتضت بالامر الواقع وطلبت ان تكون احدي صديقاتها معها
ولكن كان الرد الحاسم انت اليوم وحدك مع خالد وذهبنا الي الحوادث مساء وكنت متابع بعض الحالات التي اتت الينا وهي تغط في النوم في الاستراحة وارسلت اليها وطلبت منها ان تأتي لاني ذاهب لمتابعة بعض الحالات في العنابر وجاء ت والضيق في عينيها وطلبت منها الجلوس في الحوادث وذهبت لمتابعة الحالات وبعد قليل رن جرس الهاتف وجاء صوتها وهو منزعجا انت وين يا خالد تعال بسرعة تعال بسرعة عليك الله
حاواصل

[Lufthansa1980]

شكرا على الموضوع الجميل دا يادكتور

انت عارف زي ديل تعاين ليها من فوق لتحت

وما ترد عليها كلو كلو ...

[toto85]

كلامك صح لكن بالجد شي يقطع القلب مسكين العيان اللي بيعاين للوحدة منهم وكانها القشة المتعلق بيها للحياة وهي كانها بتدوسو بكل حقارة كفايه عليو حالة المستشفيات والسرير الراقد فيو بس حاقوليك انو الاشكال دي نادر ماتطلع من جامعات حكومية وكل احترامي للجامعات الخاصه بس احنا الضمير عندنا كانو ماده من مواد التخصص عارف في الكليه عندنا حاطين لافته مكتوب فيها يرجى مراعاة اللبس انا عن نفسي حاكون صريحه انا اساسا بحب الشياكه وده طبع اتربى فيني لكن اليوم البكون داخله فيو كلينيك بالبس اكتر شي متواضع بس مراعاة لشعور العيان اللي ممكن يعاين ليك ومابس يتمنى يتعالج لكنو بيتمنى يلبس زيك ويمشي زيك يعني باختصار التواااااااااااااااااااااااااااااضع هو اساس الانسانيه سواء كدكاترة او كمهندسين اومبرمجين .. ومافي شي اقسى من انك تقسى على خلق الله بدون وعي.......

وليك مني كل الاحترام يادكترة

Toto

[aboelshosh]

والله يادكتور الحكايه دي بقات كتيره بتمنى انو السودانين يرجعو زي زمان كان الدكتور لما يقولو سداني معناته الكلام انتهى لكن الان وييييييييييييييييييين يحليل زمان وله شنو يادكتور؟ :)

[ريلة]

دا كلو من الجامعات الخاصة كل من هب ودب يقرأ طب بدون رغبة جادة في المهنة بس كواجهة اجتماعية وتسلم يا دكتور

[المايسترو]

واتيت مسرعا الي الحوادث فقد اقلقتني نبرة الانزعاج في صوتها قولت لابد ان هناك شئ جلل قد حدث حضرت ووجدت فتاة في حوالي الرابعة عشر من عمرها في حالة حرجة جدا وهي بجانبها وتذرف الدموع ومعاها اهل الفتاة وقالت لي حصلنايا دكتور خالد دي بت خالتي المهم اجرينا الاسعافات الاولية للفتاة ببعض الدربات والحقن وتحسنت حالة الفتاة وتم تحويلها الي العنبر وقالت لي شكرا يا خالد لولاك ما كنا عرفنا عملنا شنو فرديت عليها وانا في قمة الزعل ملعون ابو الطب القريتي وما عارفة تتصرفي مع ابسط الحالات قلتي ليها والله نصيحة مني شوفي ليك شغلة تاتنية يا بت الناس وبدأ خلاف عميق بيننا من هذه اللحظة قالت لي انت انسان قاسي وما عندك اتيكيت
وارادت ان تبقي مع البنت قريبتها في العنبر فطلبت منها العودة الي الحوادث لان العيادة ليس فيها احد وانا راجع علي العنابر قالت لي واخلي قريبتي وامشي قلت لها هنا كل من يأتي الينا هو مننا وهو قريبنا.
بعد ذلك عدت الي الحوادث حوالي الساعة الواحدة صباحا ووجدتها تغالب النعاس وبدأت اتكلم معا بنفس هادي وقلت ليها يا دكتورة اسراء اذا افترضنا ان هذه البنت لم تكن قريبتك هل كان اتصلت بي وكيف كان ستتصرفين صمتت ولم ترد قلت لها كل مريض ياتي الينا يجب ان نكون نحن اهله واصدقاءه لا فرق بين احد فيهم انهم احوج ما يكونو لنا فنحن ملائكة الرحمة كما نسمي وبجب ان نكون علي قدر التسمية صمتت ثم ردت علي قائلة
حاواصل

[Lufthansa1980]

احييييييييييييييييييي انا منها دكتورة اسراء دي:chainsaw: :pissedoff: :48_48:

[بت الرباط]

بصراحة انا مشيت مستشفة الخرطوم التعليمي مرة واحدة بس السنة دي قبل ما اجي تقريبا بشهر ومشيت بالتحديد العمليات الصغيرة ،، كنت ماشة لعملية جد صحبتي وهو ما شاء الله معمر يعني عجوز ما عندو حيلة ،، هل بتكلف المستشفى نفسها لو جابت حمالة تطلع المريض على سرير ،، الراجل طلع ماشي برجلينو انا من يومها اخدت فكرة عن المستشفى دي بالذات ،، وبعدين معليش حكون دفاعية شوية ،، ما اي بت في جامعة خاصة بالضرورة تكون زي دكتورة اسراء .. اعتقد مشكلة دكتورة اسراء انو تدريبها احتمال كان اغلبو في مستشفيات عندها امكانيات عالية واسعارها عالية ولكن بتمنى انو يجي يوم تعرف هي بتعمل شنو وتقدر بالجد الوظيفة اللي هي فيها

[سيدة الاقمار]

الصراحه ما عارفه ارد عليكم بشنو انا ما كنت عارفه الموضوع يعنى بالحاله دي مؤسف ...

[شهد الملائكة]

معليش يا دكتور
وحقك علينا لكن نعمل شنو ؟؟؟
ولك العتبه حتي نجد الطبيبات البمعني الكلمة والهدفهم مصلحة البشرية وبس