PDA

عرض كامل الموضوع : البحث عن الشاعر الكبير مدني النخلي 2

هشام طمبل
12-13-2006, 10:24 PM
شباب حتي الان لم اجد الشاعر مدني النخلي فهل من جديد عندكم
khalidfazazy
12-13-2006, 10:45 PM
شباب حتي الان لم اجد الشاعر مدني النخلي فهل من جديد عندكم

أخى الغـالـى ود طمـبـل ...

لـك عذرنـا فـى التأخير عـلـى الرد ..

وإليـك إحـدى رائعـات أخـونـا الشـاعـر .. مـدنـى الـنـخـلـى :


وهج الشعاع / مدنى يوسف النخلى

يا ريتنى زى وهج الشعاع تمتد سحابات الغروب سر روعتو
وزى قدر المسافر لمدن محهولة لما تضيع خطاوى البهجة
فى همس الكتوم
حبك صبح أشتات ظلال وأطلال خيال خرافات قصتو
برحل عشان أنساك وأسيب الذكرى فى وجع الطريق
وأمسح دموع شمس الهوى المصلوبة فى صمت الغروب
وأمسح دموع قلبى التعب كان فى هواك
يقدر يتوب ما كان عشم قلبى الحزين
مترجى من عينيك حدود كان عندى فى سفر الأمل
تلقى البودع ليك وعود والليلة يا قلبى اللى راح
بروعة أشراق الورود مد الغروب المادى أيدو
ضاعت أحلام الورود زى ما بموت وهج الشعاع
khalidfazazy
12-13-2006, 10:47 PM
عشم باكر / مدنى يوسف النخلى
فى عينيك عشم باكر
وزغرودة بتزف لى الناس
خبر زمناً جديد مولود
لقيت غيرك .. بضيع إسمى
وبقيت أنا حى .. وزى مفقود

*******

لاقينى يا عشقى الخرافى
لاقينى قبال الزوال
لاقينى فى كل المرافى
زفاف ربيع .. وفرح قوافى
وإنشرى فى حزن السنابل
غيمة يا كل المشاعل
وأمشى قبّال الصباح
وزعى الطل للأزهار
وأبقى يا شوقى الخرافى
خير .. وضمى شقا البيادر

*********

لاقينى يا شوقى الخرافى
لاقينى قبال الزوال
غنوة من أزمان بعيدة
طالعة من صخب الدميرة
تلقينى راجيك فى الأماسى
وفى المراسى
.. وفى الملمات الخطيرة
khalidfazazy
12-13-2006, 10:48 PM
واقف براك / مدنى يوسف النخلى


واقف براك
والهم عصف
ريحاً كسح زهرة صباك
ليلاً فتح .. شرفة وجع
قمراً رحل فارق سماك

*******

مطر الحزن عاود هطل
جدد عذاب الأرصفة
ضى المصابيح البعيد
أتعب عيونك .. وإنطفا
لمتين مواعيدك .. سراب
والريد شقا .. حرقة .. وجفا

********

بعد المشاوير البقت .. ممدودة فى نبض التعب
بتعود وتلقى رِجاك زول
حفظ الوداد زمناً صعب
والباقى من ليل الهوى
وعطر الصبابة الما أنسكب
والباقى من كل الغنا
وسيل الكتابة ..
الما نضب
khalidfazazy
12-13-2006, 10:50 PM
لحظات ندية / مدنى يوسف النخلى


فى خاطرى لحظاتنا الندية
وإنتى ساعة المغربية
قعدتك جنبى وعيونك .. سارحة فى الدنيا البهية
وخوفنا من سفراً بودى
للمسافات القصية
وسكة الزول البسافر
وقلبو عشرة .. على البنية

*******

كنت جد .. ناوى الرحيل
إلاّ شايل ذكرى منِّك
خفت فى الغربة البعيدة
المسافات يبعدنك
العيون الشايلة سيرتك
بكرة يبكن .. ويفقدنك
والأماسى الحالمة .. ترحل
والمشاوير يتعبنك

********

شفتى كيف
لما الشمس لمت نوافير الشعاع
والضفاف بعدت كتير
والريح ملت .. جوف الشراع
كيف هناك بدت الضفاف
تتلاشى فى زمن الضياع
وإنتى ساعة المغربية ..
وخايفة من كلمة وداع
khalidfazazy
12-13-2006, 10:55 PM
صرخة .. للشـاعـر : مدني يوسف النخلي


مردودة من صرخة وصدى ..
مولودة في الزمن العقيم ..
رغم المسافة ..
الدهشة ...
والشوق والندم ...
أدمنت تحديق السراب ..
هدمت في ليل الحزن ..
أوغلت في الزمن الغياب ..
أدمنت فيك عشق الحروف ...
رغم إنهزامي مع الظروف ..
لا المدارات المسافر فيها لعيونك مداي ..
لا هواك كان مبتداي ..
لا مداك كان منتهاي ..
كنت فارد للحلم
في ليل رحيل مليون جناح
كنت فاتح صدري ديمة ..
وما بخاف في الزمن الخرافي ..
ودمي كان باقي المداد ...
نبضي في حزن القوافي ..
وصبري في الليل الودار ..
وديمة أنسج في الغناوي ..
والتواشيح القديمة ..
أعشق الأمل البعاين ..
في المسافات الأليمة ..
تسخر أقداري العنيدة ...
وتبكي أحزانها القصيدة ...
لا زفافك كان مطاف ..
للأماني وللعفاف ..
وخاصمت عيني الغمامة ..
وداس فرح عمري الجفاف ...
khalidfazazy
12-13-2006, 10:59 PM
أصل الحكاية للشـاعـر : مدني يوسف النخلي

لـو عـليك الريدة هانت
قـصة بـحكيها وبـقولا
وابـكى فى اخر فصول
قـصة الـقمر الـمسافر
من مدن فى الحسرة نامت
دمـعة الشوق فى عيونك
الـحنينة وطـيبة كانت
بـحكى لـلناس عن وداد
ومـا بقول سابتنى فاتت
قـصة بـحكيها وبـقولا
وابـكى فى اخر فصولة
قـالو فـى الامثال زمان
عـن حـكاية بدون نهاية
انـتى يـا اصل الحكاية
فى الحقيقة العايشة غاية
لـما كـانت فى عيونك
دنـيتى زفـرحة هـوايا
كـنت يا ريدى الخرافى
الـحكاية بـدون نـهاية
والـبداية بـدون نـهاية
يـا الـعليك الريدة هانت
دمـعة الشوق فى عيونك
الـحنينة وطـيبة كانت
يـحكى للناس عن ودادة
مـا بقول سابتنى خانت
قـصة بـحكيها وبـقولا
وابـكى فى اخر فصولة
khalidfazazy
12-13-2006, 11:02 PM
زهرة بخيلة .. للشـاعـر : مدني يوسف النخلي


لـو مـتلى هـداك الـحزن
او غـاب حبيب عن موعدك
لـو عـشت افراحك سراب
وابـت الـظروف ما تسعدك
كان يوم عرفتى ضنى الجرح
جـوايـا وكـتـين افـتقدك
يـا زهـرة بـخلت بالاريج
الـليلة مـات فـينى الاجيج
وفـتر حـنينى الكان زمان
عـودت كـالنوم فى العيون
وسـهرت مـحزون ما بنوم
لـو لـيلى من بعدك حزين
الـعشتو جـنبك كـان هموم
لا بقيت انا الراجى السراب
لا الـرامىاملو عـلى الغيوم
الـليلة مـات فـينى الاجيج
وفـتر حـنينى الكان زمان
يـاما الـترقب طـال وزاد
والـزاد مـواعيد فى الخيال
والـليلة فـى درب السلامة
مـن الاسـى ولـيل المحال
ارتـحت مـن شوق الغمامة
الـيـاما عـانت ارتـحال
الـليلة مـات فـينى الاجيج
وفـتر حـنينى الكان زمان
جـيتك مـعاى جانى الزمان
كـــل الـمـشاعروالمنى
تـقدر تـرجع لـيك خطاى
الـعايدة مـن درب الضنى
لا الـشوق فتر فى ليل اساى
يـقـدر يـعيد لـيك الـهنا
الـليلة مـات فـينى الاجيج
وفـتر حـنينى الكان زمان
khalidfazazy
12-13-2006, 11:06 PM
ظليلـــه .. للشـاعـر : مدني يوسف النخلي



يا ظليله ومبعث الدفء والحنان

في جبينك راقد النيل الممدد

شاغل الروح والمكان ...

وفي دواخلك نامت الاحلام هنيه

وصفقت روح الزمان...

إشتهيتك...

اشتهيتك قبلما ايدي توادعك

وتحضن الشمس الغروب

واحتويتك قبلما اغرق وتصرخ

لهفه الروح في الدروب

وبانت احزان المسافه الفاصله بينا

وراميه في وجهي الشحوب

ورف نبض اللحظة هاتف

شع نجم اللقيا باهر

رن صوتك صادق النبره

البقطر من عسل روح المشاعر

نادي من عمقي المواقف

وشحنة الفرح الموزع في البنادر

ضمه فيك شتله الامل

المعشعش في الهجاير

ولمه نبضك شعلة الحب

البتوقد في حشا الحزن المثابر

وكان قليب قلبك منور

في رحاي مفتوح وشاغر

وفي جنبيك راقد النيل الممدد

شاغل الروح والمكان

وفي دواخلك نامت الاحلام هنيه

وصفقت روح الزمان
هشام طمبل
12-15-2006, 08:11 PM
مشكور اخوي بجد شئ جميل جدا جدا جدا ولك مني كل التقدير والاحترام
khalidfazazy
12-16-2006, 01:25 AM
مشكور اخوي بجد شئ جميل جدا جدا جدا ولك مني كل التقدير والاحترام


لا شكــر عـلـى واجـب .. أخـى العـزيز ود طمـبـل ..

تحيــاتـى .. وكثير ســلامــى ..

أخـوكـم أبـداً

خــالــد فــزازى